Unsere Website ist nicht für deine Browserversion optimiert.

Seite trotzdem ansehen
Toggle Grid

Il futur dall’Allianza dal Center ha entschiet

Ils delegai dallas duas partidas cantunalas PBD e PCD han dau lur consentiment ad in futur communabel. Culla fusiun entscheiva in niev capetel per ina ferma politica dil miez el cantun Grischun.

Ils biebein 150 delegai dad omisduas partidas cantunalas han decidiu gliendisdis sera, ils 7 da zercladur 2021, simultan en duas differentas localitads sigl areal dil Plantahof a Landquart, davart il futur communabel. Ferton ch’ils delegai dalla PCD han approbau la revisiun dallas statutas e colligiau cun gliez la midada dil num sco era il contract da fusiun, ein ils delegai dalla PBD s’exprimi en favur dil contract da fusiun ed aschia per la fundaziun dall’Allianza dal Center Grischun. Cun quellas decisiun han ils presents dad omisduas partidas scret historia: Sillas davosas radunonzas dallas partidas ei silsuenter succediu l’emprema radunonza da delegai da «Die Mitte Graubünden – Allianza dal Center Grischun – Alleanza del Centro Grigioni».

La nova giunta

El contract da fusiun han las duas partidas definau la cumposiziun dalla giunta, dalla suprastonza da partida e dalla radunonza da delegai. Aschia vegn la partida sco era la fracziun menada entras in co-presidi entochen il fevrer 2024. La giunta dalla partida semetta ensemen sco suonda:

Co-presidi:
Deputau Kevin Brunold e deputada Aita Zanetti

Vize-presidi:
Yvonne Brigger-Vogel, deputau Alessandro Della Vedova, deputau Gian Michael e Martina Widmer

Ulteriurs commembers:
Nicolina Laim e Fabio Maurizio-Hischier

Plinavon ein representai ex ufficio ella giunta ils cussegliers guvernativs Marcus Caduff, dr. Mario Cavigelli e dr. Jon Domenic Parolini sco era ils commembers dall’Assemblea federala Cusseglier naziunal Martin Candinas e Cusseglier dils stans Stefan Engler. Era a far part dalla giunta vegnan ils representants dil co-presidi dalla fracziun dall’Allianza dal Center el Cussegl grond ils quals vegnan aunc elegi. A disposiziun stat il deputau Martin Bettinaglio sco era deputau dr. Reto Crameri.

La nova patria dallas valurs el Grischun

Il fundament da «Die Mitte Graubünden – Allianza dal Center Grischun – Alleanza del Centro Grigioni» schai ellas valurs libertad, solidaritad e responsabladad. Quellas valurs meinan vinavon l’ierta politica dalla PCD e PBD Grischun e vegnan interpretadas daniev el mund che sesviluppescha adina vinavon. La pli gronda finamira dalla partida ei il rinforzament dalla politica dil center sin palancau dallas vischnauncas, regiuns, dil cantun ed dalla confederaziun. L’Allianza dal Center Grischun duess porscher in dacasa politic a tut quels che mettan peisa sin ina politica che promova ina convivenza cun respect e responsabladad, mo era che risguarda la dignitad humana. Accents duein era vegnir mess tier la promoziun da dunnas e giuvenils. La partida nova duess era vinavon semetter en per finamiras politicas dalla PCD e PBD Grischun: Pil levgiament e per la promoziun da famiglias e per fatschentas pintgas e mesaunas (KMU); pil manteniment e novs plazs da lavur; per in’agricultura ferma en regiuns da muntogna ed ellas valladas; pil rinforzament da regiuns muntagnardas e dalla periferia; per in survetsch public attractiv.

Il ferm center dil cantun Grischun

En in proxim pass sviluppa la direcziun dalla partida in programm da partida al qual las commembras ed ils commembers sco era las votantas ed ils votants pon s’orientar. Oz dumbra l’Allianza dal Center biebein 2400 commembers, 44 partidas regiunalas, cirquitalas e localas, 3 cussegliers guvernativs, 1 cusseglier dils stans ed in cusseglier naziunal. Plinavon metta ella la fracziun la pli gronda el Cussegl grond.

Wir nutzen Cookies für ein besseres Nutzererlebnis.

Akzeptieren