Trais persunalitads cumprovadas dal Center per las elecziuns
26. November 2025 – Cun la fracziun la pli gronda en il Cussegl grond e cun trais persunalitads cumprovadas en la Regenza è il Center Grischun la forza politica la plim relevanta dal chantun ed in garant per la stabilitad. Per las elecziuns da la Regenza dals 14 da zercladur 2026 propona la partida danovamain ina candidatura da trais. Ella preschenta ussa sia recumandaziun electorala per mauns da la radunanza da nominaziun.
«Il Grischun dovra dapli forza en il Center», è Kevin Brunold, il parsura dal Center dal Grischun persvadì. La partida stettia per soluziuns concretas e respostas sinceras a las sfidas centralas dal chantun. In Center ferm, orientà a soluziuns, saja la forza che collia e che portia enavant il Grischun. Quai sa mussia betg l’ultim tar il svilup positiv dal Grischun: «La situaziun finanziala è solida, l’attractivitad d’abitar è auta e la qualitad da viver vegn renconuschida en moda positiva», uschia deputà Brunold.
La fermezza da la partida è fundà sin ina basa engaschada e sin persunalitads engaschadas en tut las regiuns linguisticas. Ellas prendan serius ils basegns da la populaziun e s’engaschan mintga di per lur giavischs. «Cun questa recumandaziun electorala preschentain nus in ferm team ch’unescha l’experientscha, la voluntad da furmar e l’enragischaziun regiunala», constatescha il parsura.
Forzas cumprovadas per las sfidas futuras
Il Grischun è confruntà cun grondas sfidas. Las commembras ed ils commembers da la Regenza en uffizi Carmelia Maissen (annada 1977, dr. phil. dipl. Arch. ETH) e Marcus Caduff (annada 1973, dipl. Ing. Agr. ETH / MAS MTEC ETH) han cumprovà durant la legislatura currenta lur cumpetenza da manar e diriger ed en quest temp pretensius han els prendì decisiuns curaschusas per il bainstar dal Grischun. Els èn motivads d’impunder vinavant lur savida, lur rait da contacts e lur experientschas per il svilup dal chantun e da gidar a concepir l’avegnir dal Grischun.
Aita Zanetti, l’intermediadra cumprovada dal Grischun dal sid
Cun Aita Zanetti (annada 1970, pura, commerzianta, presidenta communala) stat ina dunna fitg cumpetenta cun experientscha tant legislativa sco executiva a disposiziun per las elecziuns da la Regenza dals 14 da zercladur 2026. Ella è dapi l’onn 2023 presidenta communala da Scuol – la vischnanca cun la pli gronda surfatscha da la Svizra – stat per ina gestiun precauta, conscienta da responsabladad ed a medem temp pronta da prender decisiuns. Grazia a sia moda averta ed integrativa reussescha ella adina puspè da reunir gruppas cun interess divergents e da sviluppar soluziuns solidas.
Aita Zanetti è deputada en il Cussegl grond (circul electoral Suot Tasna, dapi il 2018) ed è s’engaschada gia l’onn 2021 sco presidenta dal Cussegl grond cun success per ils interess da la populaziun grischuna. Ses avis da purtar cuminaivlamain fermezzas, da prender per mauns deficits en moda solidarica e da vesair differenzas sco enritgiment caracteriseschan sia tenuta politica. Sco mamma da quatter uffants, pura ed abitanta dal Grischun dal Sid ha ella ina profunda chapientscha per la diversitad ed ils basegns dal chantun.
Responsabladad e stabilitad per il Grischun
Cun sia recumandaziun electorala contribuescha il Center Grischun decisivamain a la stabilitad politica dal chantun. Las candidaturas dal Center stattan per cuntinuitad, equiliber ed la clera intenziun da formar ina politica en l’interess da l’entira populaziun dal Grischun.
«Questa responsabladad è per nus a medem temp impuls ed obligaziun», accentuescha Brunold. La finamira saja da segirar vnavant la basa da viver en tut il chantun e da rinforzar la libertad da la populaziun da decider a moda autonoma.
La radunanza da nominaziun dal Center Grischun ha lieu ils 23 da schaner 2026.