Nominaziun da duas glistas principalas
3. March 2023 – L’Allianza dal Center dal Grischun ha nominà questa saira sias candidatas e ses candidats per las elecziuns naziunalas dals 22 d’october 2023. La partida candidescha cun duas fermas glistas principals per las elecziuns dal Cussegl naziunal. Ultra dal cusseglier dals chantuns en uffizi Stefan Engler e dal president dal Cussegl naziunal Martin Candinas candidescha l’Allianza da center dal Grischun cun quatter dunnas e tschintg umens.
La direcziun da la partida e la direcziun dal cumbat electoral da l’Allianza dal Center dal Grischun han pudì proponer a la radunanza da delegadas e delegads al Plantahof a Landquart persunalitads enconuschentas sin nivel chantunal per la nominaziun. Sco cusseglier dals chantuns candidescha Stefan Engler (1960) l’actual commember dal Cussegl dals chantuns cun gronda experientscha per ina quarta perioda d’uffizi. Stefan Engler, oriund da Surava fa part da la chombra pitschna da la Chasa federala dapi il december 2011. Avant è el stà durant 12 onns cusseglier guvernativ dal Grischun. Cun resalva da sia reelecziun vegn Stefan Engler probablamain proponì sco president dal Cussegl dals chantuns il 2026. “Sche jau vegn reelegì ils 22 d’october sco cusseglier dals chantuns empermet jau da tematisar e da represchentar vinavant cun forza las dumondas relevantas per noss chantun e per noss pajais”, ha Stefan Engler ditg. Quai saja sia motivaziun da sa metter a disposiziun per in’ulteriura perioda d’uffizi sco cusseglier dals chantuns.
Duas fermas glistas principalas
Per las elecziuns dal Cussegl naziunal èsi gartegià a la partida da metter ensemen duas glistas principalas cun persunalitads enconuschentas ed optimalmain qualifitgadas dal Grischun dal nord, Grischun central e dal Grischun dal sid. A la testa da l’emprima glista stat l’actual president dal Cussegl naziunal Martin Candinas (1980), Cuira. Candinas che è creschì si a Rabius fa part da la chombra gronda dapi il december 2011. Era Candinas sa metta a disposiziun per ina quarta perioda d’uffizi.
Ultra da Martin Candinas han las delegadas ed ils delegads era nominà las suandantas candidatas ed ils suandants candidats per las elecziuns: Sin la glista 1 èn ils nums da la deputada dal Cussegl grond Eleonora Righetti (1991), Verdabbio; dal deputà dal Cussegl grond e vicepresident da la fracziun Reto Crameri (1990), Surava; dal deputà dal Cussegl grond Ursin Widmer (1989), Favugn e da la suppleanta dal Cussegl grond Renate Cadruvi-Lustenberger (1975) Cuira. Sin la glista 2 èn ils nums da la deputada Luana Bergamin (1985), Lai; dal deputà dal Cussegl grond Timo Schneider (1991); dal deputà dal Cussegl grond e co-president da partida Kevin Brunold (1985), Surcuolm; da la deputada dal Cussegl grond e presidenta communala Nina Gansner (1979), Seewis; sco era dal deputà dal Cussegl Grond Martin Binkert (1971), San Murezzan.
Las candidatas ed ils candidats èn vegnids nominads per acclamaziun da la radunanza.
20 pertschient cumpart da las vuschs
La partida va en il cumbat electoral cun il motto «Dapli nus – damain jau. Nus tegnain ensemen la Svizra». Il co-president da la fracziun, Martin Bettinaglio ha preschentà la strategia e la finamira da las elecziuns. L’Allianza dal Center è la partida la pli ferma en il parlament grischun ed ha la maioritad en la regenza grischuna. L’Allianza dal Center vul restar la partida la pli ferma e vul cuntanscher ils 22 d’october ina cumpart minimala da 20 pertschient da las vuschs da las votantas e dals votants. Sco finamira minimala ha Bettinaglio plinavant inditgà da mantegnair ils mandats en il Cussegl dals chantuns ed en il Cussegl naziunal.
Colliaziun da glistas – anc avert
Ulteriuras glistas da l’Allianza dal Center dal grischun èn pussaivlas. La partida giuvna dal chantun ha tranter auter previs ina glista. En connex cun colliaziun da glistas per las elecziuns dal Cussegl naziunal n’ha l’Allianza dal Center dal Grischun anc tratg nagina decisiun. Discurs correspundents cun autras partidas han lieu actualmain cun la direcziun da la partida e dal cumbat electoral. Davart ils resultats da tals discurs vegn la partida ad infurmar pli tard.
Era la presidenta dal Cussegl dals chantuns Brigitte Häberli ha acceptà l’invitaziun a Landquart. En ses discurs ha la dunna da la Turgovia purtà ils salids da la direcziun da la partida naziunala. Plinavant ha la radunanza elegì Eleonora Righetti da nov en la direcziun da l’Allianza dal Center dal Grischun. Il giuven pianist Jan Aurel Schertenleib ha embellì l’occurrenza cun producziuns musicalas. La radunanza è vegnida averta da la co-presidenta e deputada dal Cussegl grond Aita Zanetti e terminada da la manadra dal cumbat electoral e co-vicepresidenta Yvonne Brigger-Vogel.
La fasa decisiva dal cumbat electoral vegn l’Allianza dal Center dal Grischun a lantschar cun il di da partida e cun “l’avertura dal cumbat electoral” la segunda mesadad d’avust.
