Per in provediment da vegliadetgna stabil – uss ed egl avegnir
25. August 2022 – Las delegadas ed ils delegai dall’Allianza dal Center Grischun han priu las parolas per la votaziun naziunala dils 25 da settember 2022. Els dian claramein Gie all’AVS21 sco era agl augment appartegnend dalla taglia sin plivalur. Na dian ils delegai all’iniziativa davart igl allevament intensiv. Plinavon ha la suprastonza dalla partida priu la parola Gie tier la refuorma per abolir la taglia aniticipada.
A caschun dalla radunonza da delegadas e da delegai bein frequentada a Cuera ha l’Allianza dal Center Grischun priu las parolas da votaziun per ils projects naziunals dils 25 da settember 2022.
Gie all’AVS21
«Igl ei in onn decisiv per nossa pli impurtonta ovra sociala», admonescha Sandra Baltermia-Guetg, presidenta dall’Allianza dal Center Dunnas Grischun. La partida dil center ei s’engaschada fermamein per il stabiliment dall’AVS. Encunter quella buna soluziun han las partidas seniastras ed ils sindicats priu il referendum ch’ei reussius ils 29 d’avrel 2022. «Quei ei nuncapeivel e senza responsabladad», aschia Sandra Baltermia-Guetg. L’Allianza dal Center ei encunter quei referendum e s’engascha per in provediment da vegliadetgna stabil per tuts – uss ed egl avegnir.
Ils delegai da l’Allianza dal Center han approbau unanimamain l’augment appartegnend da la taglia sin la plivalur.
Na all’iniziativa davart igl allevament intensiv
Igl allevament intensiv ord vesta dall’iniziativa muntass «gronds menaschis, tier ils quals il beinstar dils animals vegn violaus sistematicamain», di il deputau e pur Gian Michael. La tratga d’animals en Svizra ei denton structurada en moda pintga, sebasa en cumparegliaziun internaziunala silla pli strentga lescha federala davart la protecziun d’animals e vegn controllada a moda cumplessiva. «Ei dat negina violaziun sistematica dil beinstar dils animals en Svizra», ei Gian Michael perschuadius.
Il standard da Bio-Suisse che vegn pretendius dall’iniziativa exista gia oz e po vegnir cumpraus sil marcau. L’iniziativa muntass la sperdita dalla libertad d’eleger.
Ils delegai dall’Allianza dal Center han refusau unanimamain quell’iniziativa a caschun dalla radunonza da delegai a Cuera.
Gie alla refuorma dalla taglia anticipada
Oz caschuna la taglia anticipada finanziaziuns d’interpresas egl exteriur. Aschia vegnan entradas fiscalas e pusseivladads da fatschenta ell’altezia da milliuns regaladas agl exteriur. Il Cussegl federal ed il parlament vulan midar quei. Interpresas svizras duein survegnir medemas cundiziuns per la recepziun da capital (distribuziun d’emprests) sco egl exteriur e duein cunquei buc vegnir disfavurisai. Egl avegnir duein ils retgavs da tscheins sin las obligaziuns indigenas perquei vegnir liberai dalla taglia anticipada. Tier obligaziuns digl exteriur sco era tier quellas da grondas bancas ch’ein relevantas per il sistem exista gia oz negina taglia anticipada.
La refuorma porta entradas da taglia anavos en Svizra. Sche taglias vegnan buc pli pagadas el Luxemburg, mobein en Svizra, han tut las Svizras e tut ils Svizzers enzatgei da quei. El medem temps profiteschan ils cantuns, ils marcaus e las vischnauncas da finanziaziuns pli favoreivlas en Svizra. Quei protegia il tractament da daners da taglia. Ei resta dapli per autras incumbensas che vegnan dabien a tuts.
La suprastonza dalla partida dall’Allianza dal Center recamonda d’acceptar la refuorma da la taglia anticipada a caschun da la radunonza da delegai.