Ensemen per igl avegnir dil Grischun

14. March 2022 – La populaziun grischuna elegia sia representanza ella regenza sco era el parlament cantunal ils 15 da matg 2022. Al di da partida cantunal dils 12 da mars 2022 ha l’Allianza dal Center Grischun lantschau ufficialmein las elecziuns. Dalla partida eran denter auter la candidata per la regenza Carmelia Maissen ed ils dus cussegliers guvernativs en uffeci Marcus Caduff e Jon Domenic Parolini, sco era las candidatas ed ils candidats pil Cussegl grond. L’Allianza dal Center ha lu era presentau il cumpass da partida.

«Die Mitte Graubünden – Allianza dal Center Grischun – Alleanza del Centro Grigioni» metta actualmein treis cussegliers guvernativs ed ei cun 47 deputadas e deputai la pli ferma fracziun el parlament cantunal. Ella representa la varietad dil cantun e semetta en per il manteniment da tenutas fundamentalas da viver ch’ein stabilas ed aschia per l’autodeterminaziun dalla populaziun el Grischun.

Il cumpass da partida dall’Allianza dal Center Grischun

Il fundament dalla «Die Mitte Graubünden – Allianza dal Center Grischun – Alleanza del Centro Grigioni» fuorman las valurs libertad, solidaritad e responsabladad. La convivenza solidarica, reponsabla e respectusa fuorman la basa per ina politica che s’orientescha a soluziuns. Las valurs e las tematicas ha la partida dil center tschaffau el cumpass da partida. Quel scaffescha orientaziun denter ils pols e pussibilitescha soluziuns solidas per las sfidas digl avegnir.

Ensemen el Cussegl grond: 110 persunalitads en 39 circuls electorals

L’Allianza dal Center Grischun selegra da saver ir ellas elecziuns cun 110 persunalitads cun experientscha e contacts politics, sco era cun persunalitads novas e giuvnas ed in diember legreivel da dunnas. Ensemen stattan els per il svilup dallas regiuns e per igl avegnir dil cantun. Per las elecziuns da renovaziun dil Cussegl grond dils 15 da matg 2022 tschenta l’Allianza dal Center Grischun 110 persunalitads en tut ils circuls electorals (39/39).

Ensemen ella regenza: treis persunalitads cumprovadas

Baghegiar punts ensemen – Muort sia lavur sco presidenta da vischunaunca dalla vischnaunca fusiunada giuvna e diversa Ilanz/Glion ed era sco deputada enconuscha Carmelia Maissen ils basegns dalla regiun. Cunquei semetta ella en per la coesiiun dalla societad, ina ferma mobilitad e per soluziuns d’energia orientadas viers il futur.

Crear igl avegnir ensemen – Il Grischun stat avon las pli grondas sfidas economicas dapi decennis. Il cusseglier guvernativ Marcus Caduff semetta cunquei en per ideas innovativas, ina politica agrara persistenta e per soluziuns per meglier saver unir famiglia e clamada.

Colligiar regiuns ensemen – Il Grischun ha ina liunga historia culturala e duess sesviluppar vinavon sco liug da luvrar e viver. Perquei semetta il cusseglier guvernativ Jon Domenic Parolini en vinavon per ina purschida attractiva d’educaziun, per ina scienzia che sebasa sin la pratica e per la promoziun dalla trilingualitad dil cantun.