Unsere Website ist nicht für deine Browserversion optimiert.

Seite trotzdem ansehen
Toggle Grid

L’Allianza dal Center Grischun sustegn il pachet da mesiras en favur dallas medias

Ils delegai dall’Allianza dal Center Grischun han priu las parolas davart las fatschentas federalas dalla votaziun dils 13 da fevrer 2022. Els dian Gie al pachet da mesiras en favur dallas medias, Na alla iniziativa populara davart il scamond d’experiments tier animals e carstgauns, Na alla iniziativa populara davart il scamond da reclama da tubac tier affons e giuvenils e vinavon sustegnan els la midada dalla lescha federala davart l’aboliziun dallas taxas da bul.

L’emprema radunonza da delegai egl onn niev ha l’Allianza dal Center Grischun (AdC) menau atras en fuorma digitala. Il co-president da partida Kevin Brunold selegra dalla participaziun numerusa e constatescha ch’ei vegn in onn plein eveniments – accumpignaus dallas valurs libertad, solidaritad e responsabladad. Cun Carmelia Maissen sco era ils dus cussegliers guvernativs en uffeci Jon Domenic Parolini e Marcus Caduff porscha l’AdC treis persunalitads politicamein cumprovadas per las elecziuns dalla regenza dils 15 da matg 2022.

Las delegadas ed ils delegai dall’AdC han priu las parolas suandontas per las votaziuns dils 13 da fevrer 2022:

 

Gie al pachet da mesiras en favur dallas medias

«Il sustegn da purschidas da media analogas e digitalas garantescha a l’entira populaziun ina purschida diversificada d‘informaziun», constatescha cusseglier guvernativ Jon Domenic Parolini. El cantun trilingual seigi la promoziun dallas medias – oravontut era la promoziun dallas duas minoritads linguisticas el cantun – d’impurtonza speciala. Las casas da medias contribueschan plinavon alla formaziun d’opiniun politica sco era al spért da cuminonza. Ils delegai dall’AdC sustegnan il pachet da mesiras en favur dallas medias claramein cun 58 vuschs persuenter, 7 vuschs encunter ed ina abstinenza.

 

Na al scamond d’experiments tier animals e carstgauns

«Risguardar ulivamein ils interess dils carstgauns e dils animals fuss buc pli pusseivel», declara la candidata per la regenza Carmelia Maissen. La Svizra ha ina dallas pli strentgas leschas per experiments tier animals: In experiment tier in animal vegn mo lu lubius sch’ils resultats san buc vegni contonschi sin in’autra moda e maniera. Ils scienziai astgan tier lur experiments mo luvrar cun tons animals sco necessari, ed els ston tener la grevezia schi bassa sco pusseivel. Ils delegai ein suandai alla deputada e presidenta da vischnaunca dad Ilanz/Glion ed han decidiu la parola NA cun 62 vuschs persuenter, 3 vuschs encunter tier neginas abstinenzas.

 

Gie alla midada dalla lescha federala davart l’aboliziun dallas taxas da bul

«L’aboliziun dallas taxas da bul vegn ad haver repercussiuns positivas silla plazza d’economia dalla Svizra», di il president dalla Regenza Marcus Caduff. Oravontut interpresas giuvnas dattan savens ora aczias per procurar per capital e pagan aschia ina summa considerabla da taxas da bul. Gest quellas interpresas stuessan buc vegnir strapazzadas supplementarmein. La Svizra sa vegnir pli attractiva entras ch’ella abolescha las taxas da bul. Plinavon vegn evitau che interpresas ch’ein stadas pertuccadas dalla crisa da corona e drovan agen capital, piteschan aunc pli fetg. Ils delegai dall’AdC sustegnan la midada dalla lescha naziunala davart l’aboliziun dallas taxas da bul cun 41 vuschs persuenter, tier 17 encunter e 5 abstinenzas.

 

Na alla iniziativa populara «affons e giuvenils senza reclama da tubac»

Plinavon recamonda la suprastonza dall‘AdC da refusar l‘iniziativa populara «affons e giuvenils senza reclama da tubac» che pretenda da scumandar reclama per products da tubac. Il cantun Grischun scamonda gia reclama da tubac ella publicitad.

Wir nutzen Cookies für ein besseres Nutzererlebnis.

Akzeptieren