L’Allianza dal Center beneventa la prelevaziun d’in luf problematic
21. January 2022 – La survigilonza da catscha ha sittau in luf la notg sin ils 20 da schaner 2022. Il luf ha mussau in cumportament problematic ed ei s’endisaus dapli e dapli vid il carstgaun. Perquei existeva in prighel augmentau per ils habitonts ed ils hosps en la regiun.
Ella notg sin ils 20 da schaner 2022 ha la survigilonza da catscha sittau in luf ella Cadi en Surselva. Ils inscunters cul luf enteifer il territori habitau ein s’accumluai ellas davosas jamnas. L’adattaziun dil luf al carstgaun e la resca da prighel pils carstgauns ein stadas alarmontas.
«Nus beneventein la decisiun curaschusa dalla regenza da sittar il luf problematic ella Cadi cun far diever dalla clausula generala dalla polizia», aschia Kevin Brunold, co-president da partida. La regenza grischuna, oravontut il president dalla regenza Marcus Caduff e cusseglier guvernativ Dr. Mario Cavigelli, demuossi aschia ch’ella ei promta da trer a nez las pusseivladads legalas per garantir la segirtad dalla populaziun. Plinavon creescha ella aschia perspectivas per tut ils pertuccai e cunzun per l’agricultura.
Sper quell’intervenziun punctuala ella Cadi eis ei egl avegnir d’impurtonza centrala ch’il Grischun s’engascha ensemen culs auters cantuns muntagnards tier la Confederaziun che la populaziun dil luf contonschi in livel ch’ei socialmein supportabels.
Nova revisiun dalla lescha da catscha per la regulaziun dil luf
L’entschatta dall’jamna ha la cumissiun per gl’ambient dil Cussegl naziunal approbau l’iniziativa parlamentara dalla cumissiun dil Cussegl dils stans che prevesa d’elaborar in project da votaziun per midar la lescha da catscha. In cumpromiss vast, ch’ei da menar anavos silla participaziun activa dils cantuns muntagnards e particularmein sil cusseglier guvernativ Dr. Mario Cavigelli, arva la porta per ina nova modificaziun dalla lescha cul focus silla regulaziun dalla populaziun dil luf.
Perspectivas per las regiuns da muntogna e l’agricultura
Gia pliras gadas ei l’Allianza dal Center Grischun s’engaschada per la regulaziun dil luf: culla finamira da reducir la suffrientscha inutila dils animals sco era la grevezia supplementara per ils possessurs d’animals e la fin finala culla finamira da rinforzar la segirtad per ils habitonts ed ils hosps el Grischun.